Penghidoepan Radja Belgie/Bab 9

by Tjoe Bou San

Satoe tjerita jang betoel
telah kadjadian di
Europa.

PENGHIDOEPAN RADJA BELGIE II.

Ditjeritaken
oleh:
TJOE BOU SAN.
_BATAVIA
DRUKKERIJ SIN PO
^1913.

Pembagian Buku Penghidoepan Radja Belgie Berdasarkan bab

Bab 1 | Bab 2 | Bab 3 | Bab 4 | Bab 5 | Bab 6 | Bab 7 | Bab 8 | Bab 9 | Bab 10 | Bab 11 | Bab 12 | Bab 13 | Bab 14 | Bab 15 | Bab 16 | Bab 17 | Bab 18 | Bab 19 | Bab 20 | Bab 21 | Bab 22 | Bab 23 | Bab 24 | Bab 25 | Bab 26 | Bab 27 | Bab 28 | Bab 29 | Bab 30

IX. ———

 Pada 15 November 1884, di Berlijn ada dibikin satoe persidangan oleh Vorst Bis­marck, dimana, atas moefakatnja sakalian karadjahan besar, telah dipoetoesken, aken boeka tanah Congo boeat perniagahan samoea bangsa. Leopold II, Radja dari negri Belgie, itoe waktoe lantas dianggap haknja sabagi orang jang memarenta di itoe bilangan.

 Sabagi jang kadjadian diatas, boeat orang jang tida taoe selak-seloeknja perkara, nanti mendjadi heran sekali, tapi siapa jang batja ini tjerita, nistjaja ia nanti bisa mendoega pasti, itoe samoea ada perboeatannja Gantier saorang.

 Itoe penoelis soerat kabar soeda lakoeken kerdjahan jang dipertjajaken padanja dengen berhasil bagoes. Baroe sadja sampe di kota Berlijn, Gantier lantas pergi pada gezant dari negri Belgie, dari siapa ia dapet pertoeloengan, aken berkenalan pada redacteur dari salah satoe soerat kabar, jang Vorst Bismarck sanantiasa ada amat perhatiken isi halamannja.

 Pada soeatoe hari Gantier koendjoengi itoe penoelis soerat kabar kota Berlijn dalem kantornja, dan sembari mengisap satoe tjeroetoe, ia sangadja tjari lantaran, aken membitjaraken hal di Afrika.

 „Betoel-betoel sajang sekali," kata Gantier, „jang Vorst Bismarck tida sedikit ada menginget, aken mempoenjaken djadjahan di bilangan Afrika. Itoe sabenarnja nanti bisa membawa kaoentoengan besar sekali bagi negri."

 Dengen itoe bitjara, kamoedian ia djadi bisa mendapet tempat dalem soerat kabar ia poenja sobat baroe, aken moeat satoe rentjana, dan dalem itoe ia tjeritaken terang sekali, bagimana Duitschland nanti bisa memperoleh oentoeng dengen mempoenjaken djadjahan di bilangan Afrika.

 Vorst Bismarck ada membatja itoe rentjana dengen memperhatiken satoe-satoe perkatahannja. Pada Afrika memang itoe orang besar belon pernah pikiri, tapi oleh kernah ia sekarang soeda dibikin mendoesin, mendjadi dengen sigra ia tetapken niatnja. Damikianlah maka Radja Leopold II dianggap haknja sabagi pemarenta dari Congo, sedeng Duitschland dapet sabagian dari Afrika-Barat.

 Pada 3 Maart 1885, Minister Beernaert mengasi taoe pada anggota pemarentahan Belgie, hal persidangan di kota Berlijn. Kamoedian ini perkara lantas dibri taoe pada Sri Maha Radja, dan baginda poen laloe mendjawab dengen segala kapastian, jang ia pertjaja itoe kerdjahan di Congo nanti bisa membawa kaoentoengan, dan ia harep, Belgie, dengen traoesa kaloeari oewang dari kas negri, aken bisa memper­oleh tanah di sitoe, jang nanti membawa kamoeliahan bagi sakalian rahajat.

⁂

 Dengen soenji bebrapa tahon telah berlaloe.

 Permeisoeri sanantiasa ada menjingkir sabolehnja, aken tida bertemoe moeka pada soeaminja, atawa, kaloe iaorang bertemoe satoe sama laen, permeisoeri salaloe ada berlakoe dengen hati-hati, dan bertingkah hormat sabagimana mistinja pada satoe radja.

 Siapa jang kenal ka'adahan permeisoeri tempo doeloe hari, nistjaja ia bisa membedaken, itoe njonja jang tadinja sanantiasa bergirang dan amat manis roepanja, sekarang ini mendjadi sanget pendiaman dan lesoeh. Kaloe permeisoeri maoe dioepamaken seperti kembang, adalah kembang jang soeda djadi lajoeh lantaran kenah tjahaja matahari.

 Katjintahannja lang begitoe soetji, hatinja poenja hormat pada baginda koetika ia baroe bernikah, plahan-plahan ada djadi samingkin koerang, dan pikirannja jang sanantiasa mengimpi hal kasoetjian, poen lantas mendjadi hilang sa'anteronja, tatkalah ia dapet liat soerat kabar Inggris ber­nama „The Pall Mall Gazette", terangi da­lem bebrapa rentjananja, bagimana penghidoepan baginda di loearan. Nama baginda diseboet di sitoe, sabagi orang jang soeka sekali bersenang-senang sama njonja-njonja, dan segala hal jang ditjeritaken, adalah sanget tida berimbang dengen baginda poenja tingkatan deradjat jang begitoe tinggi dan moeliah.

 Sekarang ada apa lagi jang masi katinggalan bagi permeisoeri? Ia tadinja ada berharep besar sekali, aken ngalami penghidoepan jang paling broentoeng di ini doenia, tapi sekarang, njatalah itoe samoea ada satoe impian sadja, satoe hal jang berlaloe dengen tida sedikit meninggalken bekas.

 Dari lantaran ini poen mendjadi ia tida soeka berdiam di Laeken, dimana samoea kasedihan ada bikin permoelahan. Ia pergi, dan simpan dirinja dalem astana di Spa. Di sitoe ia djalani penghidoepannja dengen soenji sekali, ampir sabagi rahajat negri biasa, dan saban-saban kase­dihan dateng menjerang kembali, adalah poetrinja, Clémentine, jang sanantiasa bri hiboeran padanja.  Permeisoeri teramat soeka dengen kem­bang-kembang dan binatang koeda.

 Dalem kamar, dimana ia ada doedoek sahari-hari, dihiasi indah sekali dengen matjem-matjem boenga. Kaloe maoe dibilang jang permeisoeri paling soeka bertempat di sitoe, itoe ada benar, kerna kamar itoe poen salaloe didjaga, aken salamanja tida berobah kabagoesannja. Waktoe moesin panas, permeisoeri bisa dapet kembang dari tamannja, boeat bikin indah itoe kamar poenja ka'adahan, sedeng di masa moesin dingin, dari ia poenja kamar kembang. (Di Europa orang-orang hartawan ada perantiken kamar-kamar boeat piara segala tetaneman jang indah, soepaja di waktoe moesin dingin, iaorang tida kakoerangan kembang).

 Salaennja itoe permeisoeri ada soeka se­kali dengen ia poenja andjing-andjing dan boeroeng-boeroeng nori. Itoe binatang-bi­natang salaloe misti berganti-ganti hiboeri ia poenja hati jang penoeh kadoekahan.

 Siapa jang koendjoengi permeisoeri di itoe masa, ia nanti dapet kanjatahan, didampingnja itoe njonja bangsawan, salaloe ada berbagi-bagi penghiboer.

 Kembang bagi permeisoeri, adalah satoe barang jang bisa membikin sabar ia poenja hati, boeroeng nori, goena membikin merdoeh ia poenja pendengeran, sedeng andjing adalah boeat ia bertjanda, aken meloepaken segala apa jang kadjadian. Bebrapa njonja astana bisa tjeritaken, hal permeisoeri poenja pakean jang petjah dan loekah di badan, jang terdapet dari ia poe­nja andjing andjing. Inilah sebabnja, maka, maski itoe samoea ada perkara jang orang loear tida bisa dapet taoe, bisa djoega ter­dapet boeat tjoekoepken ini tjerita.

 Dan kaoe, pembatja, jang soeda taoe permeisoeri poenja ka'adahan sampe di sini, tentoe djoega tida mendjadi heran, kaloe dibilang, jang lantaran itoe samoea kadja­dian, ada membikin itoe njooja bangsawan tida merasaken lagi hidoep di doenia, atawa djika maoe djoega dikata hidoep, adalah hidoep dengen tida mempoenjaken pengrasahan.

 Apa jang doeloe begitoe bisa membikin hatinja djadi djengkel, sekarang sama sekali tida diperdoeliken lagi olehnja. Penghidoepan baginda tida sedikit ia maoe ambil taoe. Samantara soeaminja pasiar di kota Paris, pergi ka Rivièra, atawa berlajar koeliling dengen ia poenja kapal, permeisoeri djalani penhidoepannja dengen seder­hana sekali: menoenggang koeda, atawa menjoengging gambar. Kadang-kadang ia pergi djoega meliat opera boeat menjenangken hati.

 Demikianlah permeisoeri poenja penghidoepan dari sahari sampe di laen hari, hingga bilah tida soeratnja Prinses Louise, jang saban-saban membikin ia sedi dan doekah, nistjaja boleh dibilang, ia ada di loear pergaoelan manoesia.

 Begitoe memang nasib manoesia di ini doenia! Satoe kali orang bertemoe katjilakahan, lantas djoega berbagi-bagi kadoekahan dengen berganti dateng menimpa, seperti tida ada aehirnja. Seperti permei­soeri, maski poen ia ingin sekali bisa hidoep terpisa dengen laen-laen manoesia, tida loepoet saban-saban ada sadja hal jang memaksa ia hadepken ka'adahan doenia jang tjilaka. O, barangkali djoega ada benar, itoe mega mendoeng jang berlajang-lajang diatas kapalanja, tida maoe berlaloe sabelon mendapet korban jang diminta!

⁂

 Pada soeatoe malem boelan Januari, da­lem satoe kamar dari salah satoe roemah makan jang paling indah di kota Paris, ada doedoek bebrapa orang, jang masing-masing roepanja ada sanget bergirang.

 Lampoe electris di itoe kamar jang loewas, ada mementjarken tjahajanja begitoe te­rang, hingga sama sabagi siang hari.

 Hawa oedara ada dingin sekali, dan ini roepanja ada terbitken itoe bebrapa orang poenja napsoe, boeat minoem minoeman jang boleh bikin anget badan, kerna saban-saban samoea gelas terisi penoeh dengen champagne, begitoe lekas djoega lantas iaorang minoem sampe kering. Dan sem­bari minoem, iaorang bitjara satoe pada laen begitoe asik seperti tida bisa bosan.

 „Sasoenggoenja akoe misti bilang padamoe, Vecsera, jang kaoe poenja soedara ada seperti satoe peri dari kajangan! Bagimanatah kaoe poenja pengliatan, Bombelles? Apatah akoe tida bitjara benar?"

 Jang berkata itoe, adalah Aartshertog Rudolf van Oostenrijk. Satelah itoe, ia angkat gelasnja jang terisi penoeh dengen champagne, dan bentoer dengen tangan, badannja satoe anak moeda jang doedoek di sabelahnja.

 Anak moeda itoe poenja moeka ada boen­der, dan berwarna mera djamboe. Matanja berkilat, tapi ada mempoenjaken sorot jang haloes. Di itoe masa, ia lantas me­ngangkat gelasnja, dan sembari melirik pada Marie Vecsera, jang berdoedoek di hadepannja, ia minoem isinja sampe kering.

 „Akoe ada satoedjoe dengen kaoe poenja bitjara, Rudolf," kata Louis Vecsera, jang doedoek di oedjoeng medja. „Akoe poenja soedara ada peri dari kajangan, dan dengen pantes djoega ia ada dapet itoe koernia dari kaoe."

 „Ho, ho!" berseroe Hoyos dengen ter­tawa, „akoe minta, djanganlah kaoe berharep dari kita poenja sobat Rudolf, hal jang boekan-boekan."

 Marie Vecsera, si peri kajangan sendiri, ada tinggal diam. Ia tida soeka dengen itoe goembira dan roesoeh-roesoeh jang tida karoean. Dan djoega ia taoe, Rudolf ada saorang jang tida kenal watas.

 Sabenarnja Kudolf memang gampang sekali loepah, dan kadang-kadang djoega ia bisa djadi begitoe gila, hingga brani berboeat segala hal, dengen meloepaken pri kasopanan. Apa poelah kaloe peroetnja soeda banjak menerima alcohol, terlebi lagi ia bisa bertingka jang boekan-boekan. Lantaran itoe maka dengen merasa sanget kwatir, Barones Vecsera meliati itoe Aarts­hertog, jang minoem sagelas dengen sagelas dibikin kering.

 Bombelles, maski poen soeda banjak minoem, djoega ada dapet liat aer moekanja itoe nona tjantik, jang sanget berkwatir.

 „Hei, Philip dateng laat sekali!" kata ia kamoedian, aken poeter haloeannja omong ka laen djalan.

 „Kanapa kaoe begitoe heran, sobat?" kata Rudolf. „Apatah kaoe tida bisa doega, jang ia sekarang sedeng berlambat-lam­batan pada Clairette?"

 „Akoe salaloe misti poedji pengatoerannja itoe prins boeat mendapetken kasenangan," kata Hoyos, „tapi itoe Clairette..."

 „Kaoe misti inget jang ini ada di tempat banjak orang!" berseroe Gravin d'Arvilles, samantara ia djiwir sedikit koepingnja itoe orang jang bitjara.

. . . . . . . . . . . . . . . . . . . . . . . . . . . . . . . . . . . . . . . .

 Aer batoe penoe di sapandjang djalanan. Daon-daon poehoen pada rontok dari tjabangnja, dan batangnja ada kaliatan menjadi poeti lantaran tertoetoep dengen ijs. Begitoe poen genteng roemah ada berkilat-kilat di terangnja lampoe electris.  Koetika itoe di soeatoe djalanan dari kota Paris, jang melintas ka satoe roemah makan besar, ada berdjalan doewa orang dengen begendeng tangan.

 Maski poen di itoe djalanan masi ada banjak sekali orang jang berdjalan moendar-mandir, . tapi marika berdoewa ada menoedjoe teroes sadja, dengen tida meliat kanan atawa kiri, seperti pikiran iaorang ada melajang ka laen tempat.

 „Hei, Clairette, akoe kira iaorang soeda lama berkoempoel satoe sama laen, dan menoenggoeken dengen tida sabar kita poenja dateng."

 „Boleh djadi, tapi iaorang toch tida boleh mendjadi mara pada kita, jang dateng se­dikit laat."

 „Mara? Itoe tida! Tapi akoe maoe kata, marika berame nanti tertawaken pada kitaorang berdoewa."

 „Tertawaken? Itoe kita traoesa ambil perdoeli! Apatah ada lebi baek dari kita tida dateng sama sekakali?"

 „Betoel begitoe! Tapi, biarlah kitaorang djalan sedikit lekasan."

 Satelah berkata demikian, marika ber­doewa laloe tjepati tindakannja, hingga sampe bebrapa kali iaorang soeda kenah toebroek orang jang melintas di djalanan.

. . . . . . . . . . . . . . . . . . . . . . . . . . . . . . . . . . . . . . . .

 „Hei, sobat-sobat, apatah tida enak sekali kitaorang senangken hati di ini kota Paris?" berseroe Aartshertog Rudolf.

 Samoea orang pada tertawa, dan Ma­riette Beauchamps, jang berdoedoek di sabelah Gravin d'Arvilles, laloe berkata:

 „Memang, tapi kitaorang poenja soeka hati di ini kali, ada membawa korban laen orang poenja kasenangan, jaitoe doewa poetri radja jang tida toeroet hadlir di sini."

 Vecsera dengen tjepat lantas koetik kakinja itoe orang jang bitjara, dan awasken padanja dengen mata seperti orang hen­dak membri inget.

 Mariette bales meliat, dan sigra mendoesin, jang ia ada salah berkata. Tetapi waktoe itoe djoega, Rudolf, jang mengarti pada siapa maoe dikenahken itoe sindiran, lantas bangoen berdiri, kamoedian berseroe dengen sengit:

 „Laloe dari sini! Siapatah jang kasi kaoe permisie, aken kaloeari omongan jang begitoe mengganggoe akoe poenja kasenangan? Kaoe mengarti, akoe tida nanti bisa tahan sabar pada orang jang tida kenal atoeran! Hajo, lekas kaloear dari sini!"

 Mariette mendjadi poetjat sabagi mait. Ia bangoen dari krosi. Aken tetapi Barones Vecsera lantas berseroe:

 „Rudolf, apa kaoe hendak berboeat? Hajo, sedarlah sedikit!"

 „Sedar? Sedar? Akoe tida perloe men­djadi sedar lagi, kerna sekarang poen akoe poenja pikiran masi terang sekali! Akoe soeda berdjandji padamoe, aken tjereiken istrikoe jang sekarang, dan kamoedian djadiken kaoe Keizerin dari Oostenrijk, tapi kataoehilah, jang kaoe djoega paling taroetama, misti toeroet akoe poenja kahendak . . . . ."

 „Rudolf, beringetlah sedikit!" berseroe poelah Barones Vecsera dengen sedikit sengit.

 „Akoe tida maoe kaoe membanta, Marie, hanja denger! Kaoe mengarti, kaoe djoega misti menoeroet akoe poenja kahendak, maskipoen kaoe soeda djadi Keizerin dari Oostenrijk! Itoelah ada hal, jang akoe poenja papa mertoewa dan ipar telah adjarken padakoe, dan ini atoeran, akoe kira, adalah jang paling baek dari apa jang itoe doewa orang terhormat bisa bri pengadjaran padakoe. Sebab, pertama akoe kira Philip ada sampe banjak ngalami matjem-matjem perkara....."

 Sembari berkata begitoe, ia laloe berbangkit dari krosi, tapi itoe sa'at djoega lantas djato berdoedoek kombali; gelas champagne jang ia pegang djadi terlepas, dan djato diatas permadani.

 Koetika itoe di loear kamar ada terdenger soeara tindakan. Tida berselang lama, pintoe lantas terboeka, dan Philip bersama Clairette laloe masoek ka dalem.

 Soeara treak ada berboenji dari sana-sini, aken oetjapi selamat dateng pada itoe doewa orang, dan di antaranja adalah Rudolf jang berseroe paling njaring.

 Masing-masing lantas memboeka tempat boeat itoe doewa orang berdoedoek. Perkaranja Mariette sigra diloepaken, dan marika laloe minoem kombali, sembari bitjara satoe sama laen dengen sanget goembira.

 „Hei, iparkoe jang tertjinta!" berseroe aartshertog sakoenjoeng-koenjoeng, „akoe kira kaoe ada loepah, adjar kenal Clairette pada kitaorang."

 „Benar sekali!" saoet Prins van Saksen Coburg. „Tapi, apatah di sini misti djoega digoenaken itoe adat istiadat?"

 „Ah, itoe tjoema boeat maen-maen sadja!" kata Hoyos, lantaran kwatir nanti terbit poelah rasa koerang senang.

 „O, kaloe itoe malaenkan boeat maen-maen sadja, dengen segala senang hati akoe nanti lakoeken, menoeroet kasoekahannja orang banjak," kata poelah Philip.

 „Bagoes! Bagoes!" berseroe Aartshertog Rudolf, sembari menepok tangan.

 „Toewan-toewan dan njonja-njonja jang terhormat, orang jang dateng bersama akoe ada bernama Clairette, dilahirken di Gent, dan ada djadi soedara sapoepoe dari sobatnja Radja Leopold, akoe poenja papa mertoewa jang terhormat, dan Vorst Bismarck, Rijkskanselier di Duitschland."

 „Hei, soenggoe tida terdoega sekali!" berseroe Vecsera dengen membikin poetoes orang poenja omongan.

 „Ia poenja paman," kata poelah Philip, aken samboengi ia poenja bitjara, „sekarang ini ada tinggal boeat samantara waktoe di kota Berlijn....."

 „Ia poenja nama?" tanja Rudolf dengen koerang sabar.

 „Victor Gantier!"  „Siapa?”

 „Victor Gantier, penoelis soerat kabar di Gent, jang sekarang ada di Berlijn, dan sedeng ripoeh mentjari kerdjahan . . . . .”

 „Itoe orang, jang soeda bisa bardaja sampe Radja Leopold bisa djadi pamarenta aseli di Congo, akoe kira, ia toch tentoe dapet banjak oepah, aken ia hidoep dengen senang!”

 „Memang, dan kamoedian nanti didiriken djoega ia poenja patoeng di tempat kalahirannja, tapi boeat ini sedikit waktoe ia misti rasaken soesa doeloe boeat dapeti itoe kasenangan.”

 „Sajang sekali!” kata kamoedian Aartshertog Rudolf sembari tertawa, „tjoba ia ada saorang jang bernama Clairette, nistjaja ia troesa lagi ngalami begitoe banjak kasoesahan seperti sekarang.”

 „Kitaorang soeda menoenggoe lama sekali, aken dapeti kagirangan, berkoempoel sama-sama kaoe,” kata Gravin d'Arvilles, dengen niat poeter haloeannja bitjara. „Sabenarnja, apatah jang membikin kaoe begitoe lambat dateng kamari?”

 „Akoe pergi memboeroe!” kata Prins van Saksen Coburg. „Akoe dapeti banjak sekali kasenangan, tapi achirnja, tida loepoet kepingin djoega rasaken kaoe berame poenja kagirangan hati di ini malem dalem kota Paris.”

 „Memboeroe memang bisa sekali membikin kitaorang djadi senang!” berseroe Aartshertog Rudolf. „Lantaran di sini kitaorang begitoe goembira, mendjadi akoe soeda loepahken itoe perkara, aken tetapi bagimanatah kaoe berame poenja pikiran, kaloe kita samoea, seperti adanja jang hadlir di ini perdjamoean, pergi memboeroe dalem oetan bilangan Oostenrijk?”

 „Bagoes!” berseroe Hoyos, „akoe tentoe nanti ikoet boeat toeroet rasaken itoe kasenangan!”

 „Akoe djoega satoedjoe dengen itoe pikiran,” kata Vecsera dengen tertawa, „tapi bagimanatah dengen njonja-njonja sakalian?”

 Di fihak prampoean pada memanggoet, atawa ada djoega jang berseroe dengen soeara njaring: „Kitaorang poen nanti ikoet bersama-sama!”

 „Pada achirnja ini boelan Januari, apatah samoea satoedjoe?” tanja Rudolf.

 „Itoe hari ada djato di laen minggoe!”

 „Ja, apa halangan ada bergantoeng dengen itoe?”  Masi lama lagi iaorang berkoempoel, sembari pasang obrol pandjang lebar. Tida brentinja gelas champagne terisi penoeh dan diminoem kering, dan koetika maoe berpisah, masing-masing laloe berdjandji, aken bertemoe kombali dalem tempat pemboeroean di Meyerling.

———————